甲∶小周啊，上趟侬讲梅兰芳“放白鸽”，格几天交关人打手机发短信，我格号头手机费暴涨，侬搭我报销脱！
乙∶假使梅兰芳呒没“放白鸽”，格末算我搭观众朋友放了一只“白鸽”，侬格号头手机费我来买单，但是梅兰芳真格“放白鸽”，而且梅兰芳勿“放白鸽”，伊格艺术成就还呒没介大来！
甲∶啊？“放白鸽”还放出艺术成就来啦？
乙∶告诉侬，梅兰芳在小辰光，伊眼睛有眼近视，眼乌珠勿大活络，格种卖相哪能好唱戏，有个高人教伊，叫伊养仔一群鸽子，只只雪白，天天早浪向朝天浪向一放，梅兰芳盯牢仔格眼白鸽勒天浪向飞来飞去，格记生活灵格呀，日长世久，梅兰芳格近视眼好来，眼睛炯炯有神，一上台卖相好勒不得了，格就叫梅兰芳“放白鸽”，我没瞎讲啊！
甲∶侬格记白相得结棍噢，不过，我格号头手机费又一天世界来！
乙∶啥人叫侬朋友介多，每号头饭局不断，从来勿吃阿嫂做格饭，手机费弄脱眼蛮正常格。只要勿是“脱底棺材”，侬肉麻点啥啦？
甲∶“脱底棺材”，哎！看看侬小周蛮有学问，侬晓得为啥要叫“脱底棺材”伐？
乙∶“脱底棺材”、“脱底棺材”，讲是一直勒讲，只晓得是讲格种用起钞票来派头大，吃光用光格朋友，大概是讲格个人掼派头掼到困勒棺材里，拿棺材底板还要掼派头伐？
甲∶勿懂了伐？勿懂了伐？告诉侬，老早上海人讲“脱底棺材”，是指有种人做事体常常“撤烂污”，做生活勿负责任。老早死人要睏棺材，啥人晓得有种人做棺材偷工减料，榫头不牢，经常棺材脱底，让抬棺材格人苦头吃煞，伊拉勿晓得走到啥地方格只棺材底会得落脱。
乙∶哦！格末格种道理也差勿多，就好像我有个朋友叫阿庆。
甲∶侬哪能有介许多朋友叫阿庆？
乙∶公安局格户口簿里有交关人叫阿庆，我又勿是人家爷老头子，好叫人家改名字格。
甲∶好好好，侬认得格眼阿庆，算侬路道粗。
乙∶上趟伊老婆要养小人勒，公司里人叫伊快点去医院，啥人晓得伊半路浪碰着仔伊老早格女朋友，女朋友拉牢仔讲仔半日，讲格才是伊那能末搭阿庆吹脱，那能末嫁仔格老公眼眼调也叫阿庆，那能末又搭格个阿庆离婚，那能末又嫁拨一个男人，格老公眼眼调又叫阿庆。
甲∶有格种事体啊？
乙∶侬勿要勿相信，格个女人吃煞阿庆，到处勒寻阿庆。
甲∶侬勿要吓我噢！
乙∶啥人晓得我格朋友阿庆拨伊七缠八缠，会得跟格个女人私奔去了。作孽啊，伊屋里格老婆还等勒医院里养小人来，格个阿庆“烂污”撤足，做仔一只“脱底棺材”。
甲∶哎！侬讲起格只“脱底棺材”，我也想起现在社会浪有一种人，赛过老早格“脱底棺材”。
乙∶我晓得你讲格是阿里一种人，格种人勿大像是中国人，伊拉勿属于中国56个少数民族，伊拉叫“月光族”。
甲∶名字好听伐？月光族，月光底下，花前月下，多少有诗意。
乙∶侬讲格有眼搭界，不过伊拉格月光是讲每个月吃光、用光、借光，只剩一个“勿光”。甲∶啥个“勿光”？
乙∶债头还勿光！
甲∶是啊，所以我一直反对格种“月光族”，我格囡娪决勿嫁拨“月光族”。
乙∶好！下趟我碰着我格朋友阿庆，会得告诉伊，有得“脱底棺材” 阿庆，也有勿“脱底”格阿庆。
甲∶对！侬一定要告诉伊！
乙∶勿“脱底”格阿庆是个负责格男人。
甲∶对！我是一个负责格男人。
乙∶格号头手机费三千八百块我阿庆按时付清！
甲∶对！格号头手机费三千八百块我阿庆……，啥地方我格号头手机费有三千八百块啦？
乙∶我格搭还有一张两千一百块电话单子，侬一道带带进末好来。
甲∶喔唷！侬结棍噢！
乙∶推扳伐？推扳伐？侬格种态度就象上海人讲格叫“软脚蟹”！
甲∶啥人“软脚蟹”？啥人“软脚蟹”？
乙∶好勒！今朝勿搭侬讲，下趟再讲啥叫“软脚蟹” ？