甲∶小周啊，上趟侬讲我是“软脚蟹”，还卖关子让我等仔一个礼拜，胃口吊足，倷侬好讲了伐？
乙∶“软脚蟹”侬吃过伐？
甲∶碰着过格，但我不欢喜吃格。吃蟹我只吃“硬脚蟹”，我买蟹老鬼！到小菜场去买蟹，侬晓得我带啥物事去？
乙∶啥物事？
甲∶带块玻璃板！
乙∶买蟹带玻璃板做啥？
甲∶格是阿拉陈家门祖传拣蟹独门秘器，今朝讲眼拨侬听听，勿好讲拨人家听格！
乙∶噢！噢！我今朝运道好！
甲∶侬拣蟹只要拿蟹摆到玻璃板浪，只要格只蟹立起来，就证明格只蟹有脚力，蟹脚里厢蟹肉厚实，格种蟹买转来肯定好吃格！
乙∶格是“硬脚蟹”，格末“软脚蟹”呢？
甲∶“软脚蟹”勿灵格，蟹脚肉质松，有种蟹脚有壳没肉，咬上去一泡水，味道一太糊涂。
乙∶是啊！倷末侬讲对了，上趟侬派头大啊，胸口乱拍，我陈国庆勿是“脱底棺材”，是个负责格男人，狠勒勿得了！叫侬带脱我格眼手机费就马上缩脱，阿算“软脚蟹”？
甲∶勿搭界格！侬格手机费要我带带过付脱，侬门槛精啊！还讲我是“软脚蟹”！装勿上格！
乙∶那能装勿上？上趟我到侬屋里去，阿嫂搭我讲∶阿拉阿庆嘴巴来事，用场一眼也呒没，是只“软脚蟹”。
甲∶啊！阿拉家主婆会搭侬格能讲啊？
乙∶伊讲侬旧年仔借拨隔壁烂大块头三角洋钿，结果讨仔五、六十趟还没讨转来，格桩事体有伐？
甲∶有啊！烂大块头动迁到西渡，我去找寻伊五、六十趟，车钿用脱仔几十块，烂大块头面孔也没看见。
乙∶所以阿嫂叫侬“软脚蟹”，人家有本词典浪讲∶格个人工作能力强，有实力，搭人家比赛不肯服输，就叫伊为“硬脚蟹”；格个人工作能力差，胆小怕事，有任务不敢接受，就叫伊为“软脚蟹”。
甲∶好了好了！侬格种比喻勿恰当，我再软也勿是“软脚蟹”，现在人家叫“软脚蟹”格是啥人侬晓得伐？
乙∶晓得格，又是我格朋友陈国庆。
甲∶啊？又搭我搭界？
乙∶勿是侬，格辰光寻勿着侬。上趟我勒兰心大戏院演出，叫伊搭我搭档，格个陈国庆名气没侬响，生活没侬好，我想请侬开销大来西，叫伊来搭档也好摆眼噱头。
甲∶派派搭侬交情蛮好，去兰心赚钞票勿叫我！
乙∶啥人晓得伊开始态度好勒勿得了，肋排骨敲得比扬琴还好听，临上场伊打只电话拨我，讲人家讲格，我格只节目勿灵格，弄得我汗汤汤滴，只好一家头上场血拼，一个半钟头下来，总算弄来一场笑声。侬讲格是“软脚蟹”伐？
甲∶脚是有眼软格，啥人叫侬勿叫我去。不过我讲格“软脚蟹”还不是格种。
乙∶格是啥？
甲∶我最吼狮格是格批球星来勒球场浪才像“软脚蟹”！
乙∶格是更加勿要讲了，原来前两年才讲中国足球的球星比赛前头狠煞，一上场格临门一脚就像“软脚蟹”，现在一批外国球星也像得着“软脚蟹”流感一样，今朝“皇马”脚头软，明朝阿森纳也变“软脚蟹”来。
甲∶是呀，有人讲有种球队一到热天扳变成“软脚蟹”，有个漫画家还画了一张漫画，叫“带只空调去踢球”，侬讲“吼狮”伐？
乙∶所以人家又弄仔一只歌，我唱眼拨侬听听∶
(女)：阿妈，欧文为啥突然自己倒下？
(妈)：(沪语)因为伊是一只软脚蟹。
(女)：这种状态不如转会申花。
(妈)：(念白)便宜的不要。
(合)：欧文、申花和软脚蟹就是吉祥的一家。
甲∶侬讲“吼狮”伐？我越听越“吼狮”！
乙∶勿要讲侬“吼狮”，人家这帮球星也“吼狮”格。侬晓得伐？格几天舞林大会闹猛得勿得了，还有一个人好好叫“吼狮”来。
甲∶啥人？
乙∶我格朋友阿庆。
甲∶瞎讲！
乙∶好！今朝勿讲，下趟再讲伊为啥“吼狮”？