乙∶爷叔！上趟我勒兰心大戏院演出，门口有不少贩卖票子格人，闹猛得勿得了，侬晓得格种人有一种名字伐？
甲∶格种人叫“黄牛”！
乙∶格末为啥要叫伊拉“黄牛”，勿叫“白牛”、“黑牛”呢？
甲∶格难勿到我格，讲起“黄牛”要从“拉黄牛”讲起，老底子上海有种车子叫黄包车，格种车子上桥格辰光一个人拉勿大动，赛过一头黄牛勿肯过桥，格辰光桥浪等了几个人马上冲过来帮侬拉车子，拉过桥，坐车子格人拨伊拉几只铜板，伊拉赚眼辛苦铜钿。
乙∶噢！格叫“拉黄牛”，帮车子过桥，也算是中介唠！
甲∶是格，后来人家省脱“拉黄牛”格“拉”字，直接叫拉“黄牛”格人是“黄牛”。
乙∶噢！“黄牛”是格能介叫出来格。
甲∶倷末拉格种黄包车过桥也有讲究，侬帮忙拉一定要勒车子前头拉，咬紧牙关，老吃力格，象只黄牛勒拖车，坐车子人看得见侬吃力，好拨铜钿。假使伊勒后头推车子，坐车子人看勿大见，下桥辰光车子朝桥下一冲头，追也追勿着，只好算白推。
乙∶还介有讲究啊！
甲∶当然，格是“拉黄牛”几十年拉出来的血汗经验。
乙∶难怪侬身板介结棍，原来做仔几十年“黄牛”。
甲∶勿要瞎讲，人家讲我像“黄牛”，但我从来呒没做过“黄牛”。
乙∶格末现在人家讲格“黄牛”好像意思有眼勿一样，现在“黄牛”还不单单是做倒倒票子、卖卖卡格生活。
甲∶对啊！有种“黄牛”分工明确，见缝插针，啥地方缺啥，伊拉就去弄啥，过年弄火车票，中秋节弄月饼票，演唱会弄门票，平常还蹲勒银行门口调调外国钞票，只要有利可图，到处看得见“黄牛”。
乙∶伊拉就弄弄门票倒也算了，赚眼辛苦铜钿。现在还有种“黄牛”升级了，大家叫伊拉“托”，违法乱纪，赚起钞票来恶狠狠，弄起人来毫无人性！
甲∶现在有交关“托”，婚姻介绍有“婚托”，房屋租赁有“房托”，要捧明星有“星托”，跑到药房有“药托”，马路上贩卖垃圾香烟有“烟托”，电影院里放大片有“影托”，顶顶难项是医院门口有“医托”。侬碰着过伐？
乙∶（扮医托）喔唷！陈老师！陈老师！哪能介巧啦！
甲∶（扮名人）侬认得我啊！
乙∶哪能勿认得，侬是大名鼎鼎，日日勒电视浪见面格呀！
甲∶对对对，格段辰光蛮忙格。
乙∶侬是陈……陈……陈道明！
甲∶啊？
乙∶陈老师，侬格名字像黄河奔腾，滔滔勿绝，一直奔到黄浦江！
甲∶对勿起！我还有事体，下趟再聊！
乙∶（拉住陈的手不放）好好，陈老师，侬是大忙人，不过身体也要当心。
甲∶谢谢！谢谢！
乙∶我看侬蛮吃力格，有点生病格样子！
甲∶勿会格！上个月刚刚检查过！
乙∶（放手）唉！有种毛病就是上个月没有，格个月刚刚生出来，格叫CA早期！
甲∶（走开几步，听此言又回过来）啥？有格种道理？
乙∶当然有唠，不过没介巧，侬陈老师可能勿会生，毛病见侬怕格！阎罗王见侬也怕格！
甲∶我想想也没介巧！
乙∶是格，勿怕一万，只怕万一，我是看侬陈老师面孔浪有一块黄斑，我担心啊！
甲∶啥格黄斑？
乙∶陈老师，叫仔侬是我格偶像，我才肯搭侬讲，阿拉老师，就是上海复旦大学医学院的黄教授，专门研究早期绝症，伊发现生绝症格人早期面孔浪才有一块黄斑，由小到大，由黄到黑，到黑了末就没救了。
甲∶真格啊！
乙∶肯定真格，我陪侬去看看，今朝正好阿拉黄教授来做专家门诊，就勒前头地段医院。
甲∶侬是学啥格！
乙∶我是黄教授格博士生，专门研究黄斑狼疮。
甲∶哦，黄斑狼疮我晓得格，要死人格。
乙∶侬放心好来，我看侬这块黄斑还只有一个礼拜，早点检查可以早点手术，否则勿要太吓人噢！
甲∶对格对格。
乙∶不过，阿拉黄教授是专家呀，专家比一般医生价钿总要贵一眼，陈老师，侬承受得了伐？
甲∶啥闲话，为了身体健康，钞票总要用脱眼，侬讲，黄教授格专家门诊啥价钿？
乙∶阿拉黄教授看病人勿贵格，不过对格个黄斑检查老严格，要反复查，认真查，查清爽病因再好动手术，否则让病人糊里糊涂上手术台，格种事体黄教授从来勿做格！
甲∶对对对！要好好叫查一查，否则我上去开一刀没名堂格！
乙∶侬先去验只血，再去检查体重指数BMI、腰臀围比值、血压、动脉阻塞指数（ABI）、血小板聚集（PAg）、血浆和血液粘度（PV、WBV）、纤维蛋白（Fib）、血沉方程K值、RBC压积(Hct) 、RBC聚集和变形（EAI、TK）指数……
甲∶噢唷，我听勒头也晕了！
乙∶侬勿清爽勿要紧，阿拉会得一笔笔用电子清单拨侬看格，侬只要办一张VIP卡，接下来看医生按六折收费，侬看可以伐？
甲∶只好格能来，办一张VIP卡要几钿？
乙∶陈老师，侬是名人啊，一般VIP卡要两万，阿拉黄教授讲要对名人特别优惠，因为名人对社会有贡献，阿拉黄教授也是名人，伊老想得着名人格痛苦，所以名人办VIP卡统统打六折，而且第一趟看毛病还打五折，以后也统统打六折。
甲∶黄教授介想得着名人，真是难得，不过我现在袋袋里钞票勿够。喔唷，拨侬讲法讲法我好像身浪有眼勿适意，侬好帮帮忙送我去见黄教授伐？
乙∶好好！陈老师，钞票勿够勿要紧格，侬是名人啊，老讲信用格，用信用卡也好付格。
甲∶快送我去，信用卡我有格，交拨侬，侬快点去刷……
乙∶喔唷，陈老师，看毛病要紧。格末密码是……
甲∶密码是1…23…123…8283。
乙∶陈老师，侬真是幽默大师，格只密码噱勒勿得了！
甲∶侬比我还会噱，噱得我团团转！你真是天下最噱格好人啊！
乙∶喔唷，陈老师，格张卡刷勿出来！
甲∶我忘记脱了，我上个月去看过一趟黄医生，拨伊刷光来！
乙∶啊！